venres, 21 de maio de 2021

CONTACONTOS

 

Hoxe o alumnado de 1º e 2º asistiu no patio do cole a un contacontos, realizado por Felipe Díaz "Caxoto" de A trastenda dos contos.

Contoulles como foi a infancia de Xela (autora homenaxeada este ano polas Letras Galegas) baseándose no libro Non te amola! Sobre todo, o que lle gustaba facer cando era cativa: cazar grilos, lanzar terróns, camiñar polo monte... Tiña moitas aventuras e historias que contar na súa cabeciña. Un día o escritor Manuel María visitou a súa familia e díxolle que collera unha libreta e empezara a escribir. Dende aquela non parou ata que morreu. Tamén lles contou un conto dun moucho, animal que coñecía moi ben Xela, xa que había na súa aldea.

Despediuse cun blues creado por el dun poema da Manuel María, Eu teño un barco. Ademais convidou a todxs a coller unha libreta vella e escribir as historias que teñen na súa cabeza.

Déixovos unhas fotos desta actividade. Ollade que ben o pasaron!





Pasárono xenial!
Biquiños




 

luns, 17 de maio de 2021

17 DE MAIO, DÍA DAS LETRAS GALEGAS


Hoxe é o día grande das nosas letras e para festexalo fixemos un mural, no que a protagonista é Xela Arias, a escritora homenaxeada este ano. Foi un traballo colaborativo, no que participou todo o alumnado do colexio, dende infantil ata 6º de primaria. Como estamos moi comprometidos co noso planeta (título do proxecto deste curso) fixemos dúas árbores decoradas con follas de carballo e castiñeiro (árbores autóctonas da nosa terra). Cada clase tiña que decoralas con versos, debuxos, títulos de libros de Xela Arias. Quedaron moi chulas. Ollade!




Tamén realizamos, como todos os anos o tradicional concurso "Que sabes de..." sobre o persoeiro homenaxeado nesta data.


Ademais na Hora de Ler, a rapazada estivo traballando e investigando sobre a figura de Xela Arias e léronse anaquiños dalgunhas das súas obras.
A rapazada de 3ºA foron a Voz da Pedra a recitar un poema de Xela Arias. Escoitade con atención!

 
 O alumnado de 1ºA agasallounos cun poema que foron recitar a nosa radio. Escoitade!

Noraboa, un traballo fantástico!

venres, 14 de maio de 2021

CHARLA SOBRE RECICLAXE (EDUCACIÓN AMBIENTAL)

 Ola amiguiñxs:

Hoxe o alumnado de terceiro asistiu a unha charla sobre residuos. Foi impartida por Eloy de la Iglesia, unha persoa que sabe moito deste tema e que se dedica a impartir charlas sobre educación ambiental. Esta charla foi xentileza de ECOEMBES por participar no proxecto de METEOESCOLAS.

Eloy faloulles da importancia das tres erres: REDUCIR, REUTILIZAR e RECICLAR. Tamén dos contenedores de cores. Aínda que xa sabían moitas cousas, aprenderon un montón. Agora a seguir poñendo en práctica todas estas accións para axudar na loita contra o cambio climático, xa que como di o noso proxecto deste curso:

"Comprometémonos  co noso planeta"

Pois a seguir así, realizando accións que axuden ao noso planeta. E non vos esquezades, por pequeniñas que estas sexan, pouquiño a pouco entre todxs, conseguirémolo!

Déixovos unhas fotos desta actividade. Ollade!








Moitas grazas Eloy! Unha charla moi interesante!
Biquiños








mércores, 12 de maio de 2021

SORPRESA!

 

Ola amiguiñxs:

Hoxe teño unha sorpresa chulísima para vós! O alumnado de 1ºB fixo unha película fantástica! Ao logo do 2º trimestre estiveron lendo o libro "Dona Landra no Río Revolto" da editorial Xerais e gustoulles tanto que decidiron facer unha película coa técnica Stop Motion. Foron días de moito traballo. Para facer a película tiveron que facer moitos debuxos e moitísimas fotos. Sacaron centenares de fotos! Pero o esforzo valeu a pena. A película quedou espectacular! 

Para convidarnos a súa estrea, foron a radio e gravaron a seguinte mensaxe. Escoitade!

 

Xa non vos entreteño máis. Gozade da película. Espero que vos guste tanto como a min.

   

Noraboa á rapazada de 1ºB! Encántame!

Agora déixovos o vídeo do making of, onde se recolle moi ben todo o proceso de elaboración desta fantástica curtametraxe. Ollade!


Un fantástico traballo en equipo!
Biquiños


martes, 4 de maio de 2021

"A ROUPA NON TEN XÉNERO"

 

Ola amiguiñxs:

Hoxe a mocidade de sexto participou nunha innovadora actividade que abre conciencias. Tratábase de reivindicar o dereito que cada persoa ten a manifestar a súa expresión de xénero como prefira. Como indica o lema da actividade, tratábase de demostrar que non podemos xulgar ás persoas pola súa roupa. Este evento foi organizado polo IES Johan Carballeira ao que nos sumamos o IES Illa de Ons e o noso centro. Xurdiu en apoio a un mozo de Bilbao, chamado Mikel, que hai un tempo foi recriminado por ir ao seu centro de ensino vestido cunha saia.


Xuntáronse na confluencia das rúas A pedra e Staffan Mörling de maneira que se puidesen ver e gardasen as medidas de seguridade. Un grupo formado por varias alumnas e un profesor leron un manifesto.


A continuación escribiron na rúa cun xiz de cores as mensaxes que previamente traballaran na clase. Ollade!












O día anterior o alumnado de sexto tivo unha charla, coordinada polo Departamento de Orientación e as titoras, para coñecer conceptos básicos sobre diversidade afectivo-sexual.
A noticia foi recollida por diferentes medios de comunicación nacional e local, de feito saíron no Telediario da primeira cadea. Premede na seguinte imaxe para ler a noticia nun medio da provincia.



Tamén participaron na actividade o Alcalde e varios concelleirxs con cadansúa saia.
Foi unha xornada chea de diversidade! Déixovos co lema de Clara e Noara, xa que me gustou moito e ademais recolle moi ben a mensaxe que se quería transmitir:

"Este catro de maio imos aprender
que os pantalóns non son de home
nin as saias, de muller"

Biquiños



sábado, 1 de maio de 2021

OS MAIOS

 Ola amiguiñxs:

Menuda semana que levastes! Non parades! Toda a semana traballando para facer os maios! Sei que tamén fixestes un gran traballo en familia, indo a coller xesta, fiuncho, flores; confeccionando colares con margaridas...Ollade!

Os maios quedaron espectaculares, pero creo que o mellor foi que o pasastes xenial, tanto en familia como no cole. 

Tamén me gustan as coplas que fixestes de xeito cooperativo nas clases e que logo cantastes arredor do maio. Ollade!

A rapazada de 5º tamén fixo o seu maio e a súa copla. Premede na imaxe para velo!


Logo o alumnado de terceiro foi a nosa emisora  A voz da pedra a cantar as coplas. Escoitade! 

  
Noraboa! Un traballo fantástico! Gústame que recuperedes a nosa tradición cultural.

Biquiños