Texto de Jorge Luján e ilustracións de Piet Grobler
Versos para enaltecer a beleza que nos rodea: o ceo, os froitos, os astros, a natureza... Un pracer para a vista e unha fonte de evocación para os demais sentidos.
Na entrada do cole podemos ver unha pequena exposición das diferentes imaxes de Rosalía de Castro ao longo do tempo, baseada no libro "ROSALÍA DE CASTRO, IMAXE E REALIDADE" de Fernando Pereira Bueno (Xerais) e que se pode atopar na biblioteca.
Os seus rasgos máis característicos aparecen sempre, aínda que interpretados de diferentes maneiras segundo os artistas, dende fotografías antigas ata a versión Pop Art, pasando polos retratos e as caricaturas.
As imaxes dende a súa xuventude ata agora foron convertindo a esta muller defensora da súa dignidade e da súa lingua nunha icona da cultura galega recoñecida a nivel universal.
"O Premio Fernández del Riego á colaboración no ámbito editorial e cultural foi para as Bibliotecas Escolares de Galicia, unha iniciativa que se foi consolidando ao longo de dez anos e cuxo obxectivo é a dinamización da lectura nos centros escolares de toda Galicia, de primaria e secundaria. Douscentos vinte e oito centros galegos contan con CLUB DE LECTURA e nun 25% destes centros tamén funcionan grupos de lectura de adultos. Segundo a Asesoría de Bibliotecas Escolares, os responsables desas bibliotecas e os coordinadores manteñen unha xuntanza anual, os Encontros do Plan de Mellora das Bibliotecas Escolares, e o mesmo acontece cos coordinadores dos clubs de lectura na Xornada de Clubs de Lectura".
No PORTAL EDUCATIVO tamén se pode ler esta nova, despois de que o conselleiro de Cultura e Educación recollese o galardón, outorgado pola Asociación Galega de Editores, o venres 13 de marzo no Pazo da Cultura de Pontevedra, .
O director de Xerais, Manuel Bragado, tamén se fai eco da nove na súa páxina BRÉTEMAS.
O pasado venres, 6 de marzo, foi un día realmente especial para nós. O CIM do Concello de Bueu celebraba a entrega de Premios do IX concurso de viñeta e ilustración baixo o lema "A igualdade no traballo" que organiza cada ano con motivo do Día Internacional da Muller.
A nosa escola xogou un papel relevante nesta gala:
Por unha banda, Gabriel Oliveira Carballo de 6ºA gañou o primeiro premio e Inés Brión Martínez, de 5ºA e Inés Hermo Sanmartín de 6ºB cadansúa mención especial.
Ademais, correspondíanos a tarefa de levar a cabo a declaración institucional, para o que, as alumnas e os alumnos de 6º prepararan unha actuación dividida en tres partes:
Lara e Xoel deron comezo á nosa intervención compartindo con nós a historia da avoa de Xoel que foi redeira durante a súa mocidade.
Seguidamente, os mozos e mozas de 6º subiron ao escenario para recitaren un fragmento do poema de Elvira Riveiro titulado "As redes de Inés", dedicado a todas as mulleres que, como a avoa de Xoel, foron atadeiras.
Para rematar, Sabela e Jairo explicaron o proceso completo de composición e gravación da "CANCIÓN POLA IGUALDADE" (o alumnado de 6º compuxeron a letra partindo dunha melodía popular)
O sábado, día sete, saímos na portada do Faro de Vigo, en cuxo interior nos dedicaban unha fermosisima crónica a páxina completa!, pola cal queremos darlles as nosas máis sinceras grazas.
Aquí está o vídeo colaborativo (elaborado polo EDL do Sequelo de Marín), no que participamos, xunto con outros moitos centros do Morrazo, recitando o poema de Rosalía "Na lingua que eu falo".
O alumnado de Música e Plástica de 4º da ESO do IES Pino Manso (O Porriño) elaboraron un lipdub do poema "Adios Ríos, Adios Fontes..." para conmemorar o Día de Rosalía.
Dende o EEI Barrionovo (Arteixo, A Coruña) tamén nos chega este precioso video sobre Rosalía...
Para aprender e coñecer mellor a Rosalía visitade estes enlaces:
RAIOTECA blog da Biblioteca Escolar do CEIP de Andrade Pontedeume "Soños de Andel"
O 24 de febreiro celebramos o DÍA DE ROSALÍA, a nosa máis grande poeta. Para lembrarnos dela, vimos de elaborar na entrada do cole, un mural onde se pode ler o poema de CANTARES GALLEGOS " Na lingua que eu falo"
Ao igual que fixemos o curso pasado, imos participar nunha actividade colaborativa con outros centros do Morrazo que consiste na elaboración dun video conxunto onde o alumnado recita este mesmo poema. En breve publicaremos o resultado. Polo de agora, podemos lembrar o video que se editou o pasado curso co poema: "Alborada"
Aquí tendes o poema completo: NA LINGUA QUE EU FALO
O venres 13 de febreiro, despois de moitas semanas preparando os nosos traxes celebramos a gran festa do entroido. Con moito esforzo mestres, nenos, nenas, papás e mamás traballaron arreo para ter todo arranxado. Aquí tendes unha mostra de como o fixeron os máis pequeniños do cole.
E aínda que o tempo non nos acompañou, puxemos os nosos disfraces artísticos e celebramos unha gran festa no ximnasio do colexio.
Os rapaciños e rapaciñas de infantil convertéronse en reloxos de Salvador Dalí...
Kandinsky foi o artista elexido polo alumnado de primeiro de primaria...
Os nenos e nenas de segundo transformáronse en pintores...
A rapazada de terceiro e cuarto imitaron os cadros de Miró...
O alumnado de quinto optou pola arte musical e vestíronse do gran Mozart...
E os maiores do colexio emularon a arte de Charles Chaplin e o Charleston...
Todos e todas levaban ben aprendidas as súas cancións...
Este ano o Día da Paz tamén foi un día ARTÍSTICO para nós. Empezamos construíndo a paz coas nosas caras, ao estilo Andy Warhol, nun mural na entrada do cole.
Por mor da chuvia, o venres 30 de xaneiro xuntámonos todos no ximnasio, para celebrar este día tan especial, sabendo que a paz constrúese día a día.
Cada clase escribiu un pequeno texto co lema escollido, expresando os seus mellores desexos e sentimentos de cara aos demais, que despois leron en voz alta no acto de celebración :
1ºA
"Nós queremos bicARTE porque nos axudas, porque estás ao noso lado, porque nos gustas, porque nos ensinas, porque nos coidas, porque nos das de comer, porque nos levas de compras, porque nos queres, porque xogas con nós, porque eres a nosa amiga, porque queremos que sexas feliz. porque te queremos e queremos que vivas nun mundo mellor."
1ºB
"Nós queremos valorARTE porque me animas, te portas moi ben comigo, me das bicos, me das apertas, xogas comigo, me coidas, me visitas, me adoras, es bo, me ensinas cousas que non sei, me preparas a merenda, a comida e o baño, me mimas, me axudas a facer manualidades, me das agarimo, me queres todos os días, cada noite me les un conto, es o mellor, tes un sorriso moi bonito, me peiteas, me fas caso, sempre que estou contigo síntome ben.
2ºA
"Quero felicitARTE porque te esforzas en facer ben as cousas, axudas aos demais, sempre estás aí e podo contar contigo, coidas o planeta, sempre me animas cando as cousas me saen mal, me fas rir cando estou triste, Quero felicitarte por todo o amor que das a todos os que están ao teu carón."
2ºB
" Queremos agarimARTE por ser unha persoa bondadosa e desinteresada, para que te sintas mellor. por ser bo."
3ºA
"Queremos namorARTE cando saibas que nos alegramos dos teus éxitos, que nos afliximos se ti sufres, porque nos gusta o teu sorriso amable, doce, sincero, cariñoso, namóranos a túa mirada boa, limpa, tenra e despexada."
3ºB
"Eu quero lembrARTE con cariño para que te sintas feliz, pola túa intelixencia e paciencia para solucionar os teus problemas, pola túa xenerosidade para que te sintas ben, porque sempre me sentin acompañado por ti."
4ºA e 4ºB
"Queremos emocionARTE cando nos das un sorriso, cando nos les algo bonito, acndo nos das aloumiños con moitos biquiños. Queremos emocionARTE porque da nosa vida formas parte. coas nosas delicias de pinturas de arte"
"Queremos consolARTE cando estés disgustado e triste, cando non teñas plalbras e ideas para expresar o que estás sentindo. Queremos consolARTE sempre."
5ºA e 5ºB
"Queremos animARTE a quererte como es, a mellora cada día, a seguir adiante e non rendirte, a convivir en harmonía e en paz. En definitiva, a ser feliz"
"Queremos acompañARTE no día a día, para que rapaces enfermos coma ti (Eric) ou que sofren polos seus non vos sintades sós, porque estamos aquí para darvoa ánimos e axudarvoa a superar os obstáculos"
6ºA e 6ºB
"Queremos convidARTE a gozar da arte e pintarche un sorriso para que te sintas feliz en todas partes."
"Nós queremos ilusionARTE cada día cun sorriso por un mundo mellor, cheo de paz, confianza... Queremos ilusionARTE e darche esperanza coas nosas palabras para que se poidan cumprir os teus soños"
Despois os rapaces e rapazas de 6º tocaron unha peza musical coa frauta.
Como todos os anos, para rematar o acto soltamos unhas pombas e xa que non paraba de chover, fixémolo dende a porta do ximnasio.
Por mor da chuvia, os nenos e nenas de infantil, non viñeron celebrar este día con nós. Preme AQUÍe poderás ver como o pasaron.
Co gallo do noso proxecto sobre A ARTE, durante o primeiro trimestre e parte do segundo deste curso, estivemos coñecendo a algúns artistas destacados da nosa zona, O Morrazo. Premede nos nomes e saberedes como o fixemos:
A través desta postal compartimos con toda a Comunidade Educativa o resultado dun magnífico traballo feito polo noso alumnado. Este fermoso mural colaborativo atópase na entrada do cole e con el damos comezo as Festas de Nadal. Para ter maís información preme na imaxe.
Dende a Coordinadora de Equipos de Normalización e Dinamización Lingüística do Morrazo, en colaboración cos centros escolares da zona vense de elaborar unhas Guías de Lectura con recomendacións e novidades lectoras para este Nadal.
