luns, 23 de decembro de 2019

BO NADAL!

 
Con esta postal colaborativa queremos desexar a toda a comunidade educativa FELICES FESTAS. Foi feita a partir dun mural realizado por todo o alumnado do centro e que agora preside a entrada do cole. Está encabezada polo lema gañador:

"SINTONIZA O TEU CORAZÓN! QUE CADA LATEXO SEXA MÚSICA, PAZ E AMOR"


          

xoves, 19 de decembro de 2019

ROSALÍA DE CASTRO XA TEN UNHA ESTRELA

Hoxe na HORA DE LER, estivemos lendo unha noticia que nos encheu de ledicia. Unha das nosas máis ilustres escritoras, Rosalía de Castro, xa ten unha estrela.


martes, 26 de novembro de 2019

DÍA INTERNACIONAL DA NON VIOLENCIA

Conmemorouse o día saíndo por equipos á procura dos carteis que estaban colocados polo corredor. Cando os atopaban, copiábanos nos seus cadernos e posteriormente reflexionaron sobre as mensaxes dos mesmos. Logo fíxose unha posta en común. Os carteis son os mesmos que están colocados nos escaparates de diversos comercios da vila.











Traballouse asemade a canción de Rozalen "La puerta violeta". Escoitárona á vez que tiñan que rechear os ocos con palabras clave do tema. Volveuse facer unha posta en común coa mensaxe da canción. Para rematar fíxose unha lectura cooperativa dun texto que explicaba porque o 25 de novembro se celebra a xornada internacional en contra da violencia de xénero.
Ademais o alumnado de quinto e sexto acudiu a unha concentración que tivo lugar ás doce do mediodía na praza que está diante do concello. Leuse un manifesto, para poder lelo, preme na seguinte imaxe.



luns, 25 de novembro de 2019

GUÍAS DE LECTURA E MÚSICA 2019

O pasado venres todo o alumnado do noso cole levou nas súas mochilas un exemplar das guías de lectura e música en galego. Son as recomendacións feitas con moito agarimo pola Coordinadora de Equipos de Dinamización Lingüística do Morrazo.
O lema deste ano é: Atrévete a abrilo!


Ante todo queremos darlles as grazas a Ana Valuja do CEIP de Seixo pola enmaquetación e a Esteban Tarabelos polas magníficas ilustracións. Tamén agradecer á excelentísima Deputación de Pontevedra, que imprimiu as guías de xeito gratuito. Non nos podemos esquecer de todos os mestres e mestras dos colexios e institutos do Morrazo que tiveron a ben buscar e elexir todos os libros e CDs. Moitas grazas a todos e todas!
Premede nas seguintes imaxes para poder velas!




Esperamos que vos gusten e que vos sexan de utilidade.


                       


venres, 8 de novembro de 2019

POR FIN CHEGOU O DÍA!

Por fin, hoxe no Centro Social do Mar ás 20:30 é a estrea do programa Anacos de vida que gravaron hai un mes no noso cole e na nosa vila. Bueu, a través das súas xentes, é a protagonista deste programa da TVG.



O equipo de gravación veu ao noso cole para que a rapazada, a través de fotos antigas, lles contasen as apaixonantes historias que se agochan tras elas. Tamén gravaron en lugares emblemáticos da localidade: Museo Massó, Ermelo, Pescadoira, Praia de Beluso... E entrevistaron a  persoeiros vencellados á historia da nosa vila.











Estamos desexando velo! Ollade o seguinte vídeo, é un adianto do que se vai ver no programa!



Xa sabedes, temos unha cita hoxe no Centro social do Mar ás 20:30. Se hoxe non podedes ir , podedes velo mañá ás 19:30 na TVG.

xoves, 24 de outubro de 2019

ANIVERSARIO DE PAPIRUS. 24 DE OUTUBRO, DÍA DAS BIBLIOTECAS ESCOLARES

Esta semana estivemos de celebración. Hoxe foi o Día das Bibliotecas Escolares e o aniversario do noso benquerido Papirus. Uns días antes enviounos unha tarxeta para convidarnos a súa festa de aniversario, que se celebrou coma sempre, no Bibliocastelo. Na invitación tamén nos contaba que o tema do proxecto deste curso é a RADIO, e que pensaramos un nome para ela, para a radio do noso cole.   




Como somos moitos, houbo dous días de festa, un día para os cativos e cativas de infantil, 1º e 2º e outro para a rapazada de 3º, 4º, 5ºe 6º. Papirus tíñanos preparada unha gran sorpresa, o vídeo que gravaron sobre a nosa biblio e que agora está colgado na páxina de Bibliotecas Escolares de Galicia. Quedou chulísimo! Ollade!





Ademais coñecemos a historia de Martiño, o curmán de Papirus. Tamén nos contaron un relato moi interesante sobre o Titanic e o código Morse. Ata aprendemos a reproducir o noso nome neste código.





Logo fomos ver o estudio onde vai estar instalada a nosa radio. Parece unha casiña de madeira! Quedou xenial!



Para rematar cantamos a "Canción de Papirus" e a de "Parabéns". A nosa mascota regalounos un marcapáxinas e unha lambetada.


Unha festa estupenda!




sábado, 5 de outubro de 2019

EXPOSICIÓN FILATÉLICA


Esta semana abriu as súas portas o Bibliocastelo cunha fantástica exposición filatélica titulada "O mundo dos selos", organizada pola Comisión de Xuventude da Federación Española de Sociedades Filatélicas (FESOFI) e patrocinada por Correos. Estivo exposta no corredor da biblio dende o luns ata o xoves.





O acto de presentación tivo lugar o martes e asistiron representantes do Concello, da ANPA e membros de equipos directivos de centros educativos da vila.


Houbo Xornadas de Portas Abertas o martes e o mércores en horario de 16:00 a 18:00 con visitas guíadas para que a visitasen as familias e obradoiros para o alumnado.







Realizáronse ademais outras actividades:
- Charlas, xogos, visionado de vídeos...
- Concurso "Deseña o selo da túa localidade". Os alumnos e alumnas tiñan que debuxar algo representativo da súa localidade: un edificio, unha praia...Co debuxo gañador vaise facer un selo de curso legal.
Tamén se creou unha edicición limitada dunha serie de selos, onde a nosa mascota, Papirus e o noso cole son os protagonistas. Papirus estampado nun selo!! Ollade!



Os dous son deseños de Marc Taeger e son de curso legal, foron editados pola Fábrica de Moeda e Timbre.  
Esta exposición foi posible grazas ao ofrecemento do Presidente da Comisión de Xuventude da Federación, José Pedro Gómez, que dende hai anos pasa os veráns en Bueu. Dende aquí queremos agradecerlle que compatira esta colección con todos nós, tamén darlle as grazas a Marc polos seus deseños e a Juan Carlos Blanco por ensinarnos tantas cousas deste fascinante mundo, o mundo dos selos. 
Se queres máis información preme na seguinte imaxe.