luns, 24 de decembro de 2018

BO NADAL!

Con esta fermosa postal colaborativa queremos desexarvos unhas FELICES FESTAS. Foi feita a partir do mural que decora a entrada do cole e no que participou todo o alumnado.


Os cativos e cativas de Educación Infantil realizaron os bonecos de neve e os de primaria as estreliñas que o decoran. Cada estrela está dedicada a unha persoa que loitou en prol dos DEREITOS HUMANOS. Primeiro investigaron sobre elas e con toda a información fixeron unha breve reseña que colocaron no mural. Estes foron os elexidos e elexidas:
1ºA- Emilia Pardo Bazán.
1ºB-  Rigoberta Menchú.
2ºA- Annie Nushann.
2ºB- Gandhi.
3ºA- Malala.
3ºB- Clara Campoamor.
4ºA- Concepción Arenal.
5ºA- Teresa de Calcuta.
5ºB- Igbal Masih.
6ºA- Nelson Mandela.
6ºB- Martin Luther King.






O lema elexido para presidir o mural, foi o de María Otero de 5ºB. Noraboa!


Como todos os anos participaron as familias. Dende aquí queremos agradecerlles o seu esforzo e dedicación. Moitísimas grazas!
Se queredes ler todos os lemas premede na seguinte imaxe





mércores, 19 de decembro de 2018

GUÍAS DE LECTURA DE NADAL

Xa están aquí, recén saídas da imprenta, as guías de lectura para o Nadal. O lema deste ano é :
LEO, LEO, LEO, MEDRO, MEDRO, MEDRO...



Moitas grazas a Ana Valuja do CEIP de Seixo pola enmaquetación e a Marc Taeger polas fantásticas ilustracións. Realizaron un magnífico traballo de maneira totalmente altruísta.

As guías foron elaboradas por mestres e mestras da bisbarra amantes da lectura e da lingua galega. Nelas poderedes atopar novidades e reedicións de obras literarias moi interesantes e de música do último ano. Son unhas fantásticas ideas para agasallar, non só no Nadal, senón en calquera outra data. Veñen como sempre, por idades. Ollade!

   


   


   

Feliz Nadal e boas lecturas!

mércores, 12 de decembro de 2018

OS TRASNOS SON NOTICIA!


Hoxe os cativos e cativas de catro anos saíron no xornal porque gañaron un premio! Participaron no concurso "Giotto eres tú", presentando un traballo artístico chulísimo, que realizaron con material de reciclaxe. Representaron a nosa mascota, Papirus, que elaboraron con botellas de plástico pintadas de cor rosa. Completaron esta magnífica obra de arte cun barquiño, que confeccionaron con tubos de cartón. Se queredes máis información premede na seguinte imaxe.


Noraboa, sodes uns campións!

sábado, 1 de decembro de 2018

NOVEMBRO. MES DA CIENCIA EN GALEGO NAS BIBLIOTECAS

  
Como todos os anos, ao longo deste mes, celebramos o MES DA CIENCIA EN GALEGO NAS BIBLIOTECAS con varias actividades :
- Exposición de libros científicos en galego.


- Lectura e comentario do manifesto que nos enviaron dende Bibliotecas Escolares de Galicia e que realizou Luis Navarro, profesor titular de Bioloxía da Universidade de Vigo. Nel fala da importancia que tiveron os libros e as bibliotecas na súa formación tanto persoal como profesional. Se queredes lelo, pinchade no seguinte enlace
Nesta páxina atoparedes tamén información moi interesante: blogs de ciencias, materiais...
- E como non! Fixemos unha morea de traballos e experimentos! Premede na seguinte imaxe para velos.
                     




venres, 23 de novembro de 2018

DÍA INTERNACIONAL DA NON VIOLENCIA CONTRA A MULLER

Hoxe tivo lugar no Centro Social do Mar a entrega de premios do XVI Concurso de Carteis Contra a Violencia de Xénero.
Do noso cole participou todo o alumnado de 5º e 6º. A gañadora na categoría de Primaria fue Ana Mayo de 5ºA.


Recibiron mencións especiais: Eloy Alfaya, Irene Méndez, Daniel Moital e Anxo Rodríguez, de 6º de Primaria.





Con todos os carteis fixemos unha exposición no corredor.



Noraboa ás gañadoras e gañadores e a todos os participantes!


 

luns, 12 de novembro de 2018

IX XORNADAS DE BIBLIOTECAS ESCOLARES DE GALICIA

Esta fin de semana (9-10 de novembro) celebráronse no Palacio de Congresos de Santiago de Compostela, as IX Xornadas de Bibliotecas Escolares de Galicia. O lema para este curso é: Poéticas diversas na biblioteca escolar
Varios mestres e mestras do cole tivemos o pracer de asistir.
Estas xornadas son moi enriquecedoras, xa que facilitan o encontro entre profesionais dos distintos niveis educativos e de distintas disciplinas. Tamén son unha forma de compartir experiencias, traballos e diferentes propostas arredor das bibliotecas escolares. Ademais das interesantísimas ponencias, houbo mesas de debate, presentación de boas prácticas nos distintos ámbitos do mundo das bibliotecas e como en ocasións anteriores, unha sesión denominada "A fume de carozo" na que se presentaron 10 actividades moi concretas levadas a cabo en bibliotecas de centros educativos de Galicia.
A temática destas xornadas foi moi diversa: a poesía, a ciencia, as belas artes, a tecnoloxía aplicada a materiais téxtiles, a tradición oral e a música...
O mellor de todo foron as experiencias de gran calidade que presentaron como "radio na biblio", os exemplos prácticos de biblioteca inclusiva, as experiencias sobre voluntariado e formación lectora. Se queredes ver o programa das xornadas premede na seguinte imaxe.



O peche, o broche final correu a cargo do poeta Fran Alonso, que nos deleitou cos seus poemas mentras a artista urbana Nana ía pintando. Antes desta actuación, a cantante galega Uxía Domínguez, máis coñecida como Uxía, falounos de poesía e fíxonos levantar dos asentos e cantar as súas fermosas cancións. O xornal Faro de Vigo recolle nun artigo a fantástica actuación desta gran artista e a excelente organización das xornadas. Premede na seguinte imaxe para poder lelo.



Foi un auténtico pracer para os sentidos!

mércores, 31 de outubro de 2018

TEMOS DEREITO A... GOZAR DO SAMAÍN!

Como todos os anos, para conmemorar o Samaín, fixemos un mural cooperativo no que participou todo alumnado. Dado que o tema do proxecto deste curso son os DEREITOS HUMANOS o lema foi :

                        Temos dereito a...



Ademais realizamos unha exposición de cabazas coa axuda das familias. Estaban representados case todos os dereitos: dereito a educación, dereito a unha vivenda, dereito a ter unha familia, unha nacionalidade... Ollade!




















Quedou espectacular!Cada ano as familias sorpréndennos máis pola súa orixinalidade e creatividade. Este ano o tema non era doado.


Se queredes máis información premede na seguinte imaxe.


MOITAS GRAZAS FAMILIAS!









mércores, 24 de outubro de 2018

SORPRESA!

Por fin recibimos noticias de Papirus! Enviounos unhas tarxetas para convidarnos ao seu aniversario, que é o día 24 de outubro, ou sexa, hoxe.



Puxémonos contentísimos, pero a ledicia durounos pouco. Resulta que a súa casa, o Bibliocastelo, está en obras e por iso ten que adiar a celebración para máis adiante. Cóntanos que en canto estea lista a biblioteca, celebrará unha gran festa. Que ben, estamos desexando que chegue ese día!
Ollade o que nos escribiu!