mércores, 22 de xuño de 2022

DESPEDIDA!

 Ola amiguiñxs!

Supoño que estades moi contentos. Por fin as vacacións de verán! Eu estou un pouco triste porque teño que despedirme dos meus axudantes. Fixeron un traballo incríbel, axudáronme un montón! Ollade que guapos e guapas están!





Noraboa polo voso traballo! Estou moi orgulloso de vós! Moitísimas grazas pola vosa axuda! Botareivos de menos!

O ultimo día de cole foi a festa de graduación. Houbo varios obradoiros: de cociña, sinatura de camisetas, de peiteado e maquillaxe...Logo un festival chulísimo co que deleitaron aos asistentes con diversas actuacións. A profe Anita fixo un precioso vídeo cos mellores momentos deste inesquecíbel día. Ollade! 


As mestras e mestres do CEIP a Pedra e máis eu desexámosvos un futuro de éxitos e bonanza no que cadaquén de vós atope o seu camiño cara un desenvolvemento pleno. E sobre todo, lembrade que vos queremos! Boa sorte!
Biquiños

 

xoves, 16 de xuño de 2022

CAMPAÑA DE LECTURA PARA O VERÁN

Ola amiguiñxs!

Como estades? Como xa queda moi pouquiño para as vacacións e para que poidades seguir gozando do placer da lectura durante o verán, imos levar a cabo, como todos os anos, unha campaña de lectura. Ollade con atención a seguinte imaxe, nela tedes toda a información.

Non vos esquezades! Agárdovos no Bibliocastelo!

Biquiños




martes, 14 de xuño de 2022

DÍA DA LINGUA DE SIGNOS

 O 14 de xuño celébrase o Día da Lingua de Signos e coa axuda de Rosa Louro elaboramos este video para manifestar o noso apoio e amosar todo o que estamos aprendendo desta lingua grazas a ela.

Verdade que nos quedou moi chulo? Que opinades?

 

1º PREMIO XOGA COAS MANCIÑAS

 Hoxe estamos de noraboa xa que a nosa escola ven de gañar o 1º PREMIO da V CONVOCATORIA "XOGA COAS MANCIÑAS", este ano con carácter autonómico.

Esta mañá foi a gala de entrega de premios na Deputación de Pontevedra e debido ás limitacións de aforo asistiron, en representación da escola, o alumnado de 2º A e a súa mestra Rosa, acompañados de Berta e Rosa Louro.

 
Os nenos/as que asistiron á gala recibiron un broche co nome do concurso proposto pola Organización de Diversidade Sensorial de Galicia (XOGA)

Ademais agasallan á nosa escola cun Obradoiro Contacontos en Lingua de Signos.

 
No video presentado ao concurso participou todo o alumnado e profesorado do cole interpretando a canción do 50 aniversario da nosa escola en lingua de signos, baixo a dirección de Rosa Louro, a nosa intérprete de signos.

mércores, 8 de xuño de 2022

8 DE XUÑO, DÍA MUNDIAL DOS OCÉANOS

 Ola amiguiñxs:

Hoxe teño unha noticia moi importante que contarvos. Co gallo da celebración do Día Mundial dos Océanos unha emisora ambulante de Onda Cero emitiu un programa especial dende o Estaleiro de Purro, que como moi ben sabedes está situado na Banda do Río. O programa chámase Más de uno provincia de Pontevedra. Nel participou o alcalde do noso concello, Félix Juncal Novas,  Aixa Framil Cerviño e Mateo Barcia Martínez, alumnos de 5ºA do noso cole.



Se queredes escoitar todo o programa premede na seguinte imaxe. 

Parabéns para Aixa e Mateo. Fixérono xenial!
Biquiños





O BANCO DA AMIZADE DE PAPIRUS

 Ola amiguiñxs:

Hoxe estou supercontento! Xa están listos os bancos da amizade, os bancos de Papirus! Foi un traballo colaborativo estupendo. Primeiro, varias persoas do Centro Juan XXIII de Cangas fixeron os bancos de madeira. Logo a profe Anita de 3ºB foi a encargada do deseño. Debuxoume a min en cada un dos bancos. Quedei guapísimo, non si? Ollade!


E finalmente, os meus axudantes, a rapazada de 6º dirixida pola profe Anita, foi a encargada de rematar a decoración dos bancos. Foron quenes me pintaron.


Este é o banco  que pintou o alumnado de 6ºA e os artistas  e as artistas que traballaron arreo.


Estoutro é o banco decorado polos pintores e pintoras de 6ºB. Foron días de moito traballo, pero tamén de moitas risas. Ollade canto traballaron e o ben que o pasaron!


Quedaron espectaculares!!! Moitísimas grazas as persoas de Juan XXIII, a profe Anita e por suposto ao alumnado de 6º que colaborou, aos meus queridísimos e queridísimas axudantes! Estou moi orgulloso de vós!

Biquiños


sábado, 4 de xuño de 2022

"O MESTRE DOS MESTRES" ARTURO SÁNCHEZ CIDRÁS

Que sorte temos de coñecer O MESTRE DOS MESTRESArturo Sánchez Cidrás, que desenvolveu a súa faceta profesional educativa como mestre no CEIP A PEDRA durante moitos anos. 

Ademais de educador é ben coñecido por ser un gran historiador, investigador, escritor... 

O seu último proxecto que está a piques de ser publicado, xurdiu co gallo do 50 aniversario das tres escolas públicas de Bueu (A Pedra, Montemogos e Torre-Cela). Trátase dun riguroso traballo de investigación sobre a escola pública en Bueu dende os seus inicios.

 

 Neste ültimo trimestre tivo a amabilidade de pasar un tempo con todo o alumnado de A Pedra dende infantil ata 6º de primaria, así que non foi pouco o esforzo.

Remontouse ao século XIX e falounos dos tipos de escola, dos primeiros mestres que houbo en Bueu e o pouco que gañaban (30 ou 60 reais ao ano) e de que antes de que existisen A Pedra, Montemogos e Torre-Cela, a vila de Bueu estaba chea de pequenas escolas espalladas. A maioría delas estaban en casas e tiñan as cortes dos animais debaixo e tampouco tiñan aseos polo que tiñan que facer as súas necesidades nas cortes ou ao aire libre. 


Contounos que nesa época os nenos e as nenas estaban separados na escola e que non estudaban as mesmas materias. Os rapaces estudaban ciencias e matemáticas e as rapazas linguas e costura. As primeiras mestras de Bueu loitaron moito por cambiar esa situación. Incluso os mestres-homes cobraban máis que as mestras-mulleres. Había escola todos os días, non había vacacións e os domingos ián as persoas adultas. Co tempo empezouse a descansar os xoves.

Nesas datas non tiñan cadernos polo que empregaban pizarras e escribían co pizarrín. Como non había lápices queimaban a punta das varas de madeira e facían carbón para poder escribir.

 

Un pouco máis adiante, nos pupitres había uns ocos para poñer os tinteiros e facían a tinta con azucre, prantas silvestres, excrecencias dos carballos e escribían con plumas das ocas. Despois fixéronse os plumóns.


Os primeiros libros non tiñan cor nin debuxos e chamábanse enciclopedias porque tiñan todos os temas mesturados e había libros para nenos e outros diferentes para as nenas.

Tamén nos falou da miseria na que se vivía entonces. Ao chegar da escola os rapaces e rapazas tiñan que traballar na casa ou no campo e incluso había nenos/as que non podían ir porque tiñan que axudar na casa.  Os rapaces ían á escola mal vestidos e sen zapatos porque non tiñan. Algúns levaban zocos de madeira.

 A rapazada de 6º de primaria preparou unha entrevista en a VOZ DA PEDRA:


Non hai palabras para expresar o agradecemento e o honor que supón contar coa súa presenza porque escoitalo foi un verdadeiro pracer!!!