CONTACONTOS NA GALESCOLA

Onte, dúas colaboradoras da biblioteca, Luna e Antía foron a Galescola a contarlles un conto aos cativos e cativas.

 

Representaron co Kamishibai unha adaptación do conto de Carapuchiña Vermella, que elas mesmas realizaron coa axuda doutros axudantes de Papirus.

 



Fixeron dúas sesións : unha para os bebés e outra para os nenos e nenas de dous anos.

Quedaron abraiados co Kamishibai.

 

Tiveron unha colaboradora moi especial, Candela, que non se separou nin un momento delas. Tamén quería contar un conto e intentouno. Ollade as imaxes!

Quería marchar con elas para o cole dos maiores.

 

Gustoulles moito o conto, quedaron con ganas de máis e ao rematar gritaron: outro, outro!!!

Despedíronnas con moitos bicos.

Elas, prometéronlles que ían volver con máis historias. Quedáronlles ganas de repetir, xa que foi unha experiencia incrible e moi satisfactoria.

 





CONTACONTOS ESPECIAL

Hoxe, na hora de ler, no Bibliocastelo, tivemos unha visita moi especial.

 

Mateo de 1º A presentounos a Marta, a súa mamá que nos contou dous dos seus libros preferidos :

"Quiero una mamá robot" da editorial Laberinto. Un libro chulísimo cunha entrañable historia. A medida que vas escoitando o conto vas cambiando de parecer, así ao principio todos queríamos ter unha mamá robot como a do libro pero logo...vai ser que non! Preferimos ás nosas mamás!!

 

 

 Logo contounos "Perdido?" da editorial Patadepeixe. Este libro trata dun pingüín que se sentía moi só e viaxou dende a Antártida na procura de amigos. Ao final conseguiuno!

 

 

 

 

Dende aquí queremos darlles as grazas a Mateo e a Marta por compartir con todos nós os seus libros favoritos. 

 

 

MOITAS GRAZAS!



 

 

FAMILIAS COLABORADORAS

Este curso temos a gran sorte de contar coa axuda de varias mamás que colaboran coa biblioteca. Grazas a elas pódense levar a cabo actividades que sen a súa axuda sería impensable realizar. Confeccionan muráis, aportan materiais e ideas interesantísimas, preparan e realizan contacontos aos  alumnos e alumnas, etc.

Os interesados e interesadas en colaborar poden acudir os martes pola tarde ao Bibliocastelo, que é cando nos reunimos. Seredes todos e todas benvidos.

 Confeccionando as letras do mural de Rosalía de Castro

 Facendo e recortando as letras do mural da prensa

 Preparando os astronautas

 Realizando o foguete para o photocall do espazo

 Posando sobre o panel que serve de fondo ao photocall

 Facendo un simulacro de photocall espacial

UNHA GRAN OBRA!

MOITÍSIMAS GRAZAS É UN PRACER TRABALLAR CON VÓS!

RECREOS DE CONTO

Hoxe no recreo, os encargados desta semana da biblioteca e axudantes de Papirus, Hugo Freire, Aitor e Ángel, agasalláronnos cun fermoso conto, "A que sabe a lúa".

 

 

  

 

Moitas grazas rapaces, fixéstenos pasar un divertido recreo.

 

ROSALÍA GALÁCTICA

Para conmemorar o Día de Rosalía (24 de febreiro), realizamos unha actividade chamada "Rosalía Galáctica", relacionando deste xeito o proxecto que estamos desenvolvendo este curso (o espazo) coa figura da nosa ilustre escritora.

A actividade consistiu en que cada curso elaborara de forma conxunta unha historia, un conto no que a protagonista fose Rosalía e ademáis a trama tiña que desenvolverse en calquera lugar do universo (na lúa, en marte...). Cada clase fixo un, agás os de quinto que o fixeron por grupos. Este foi o resultado.

Despois con todos os traballos confeccionamos un mural que titulamos :

                        "no bico un cantar

                         nas estrelas un contar".

Os alumnos e alumnas de 2º encargáronse da decoración do mesmo, por medio dunha actividade chamada "A nosa estrela Rosalía", que consistiu en dibuxar a Rosalía dentro dunha estrela que logo decoraban. Quedaron chulísimas! Ollade, así foi como quedou...

Ademais de contos tamén houbo receitas espaciais.

Os alumnos e alumnas de infantil tamén participaron na actividade, realizando entre todos un fermoso conto colaborativo co título : "A viaxe de Rosalía".

Un gran traballo! Noraboa a todos e todas! 

CONTACONTOS : ASTROPAL, UN COMETA CON CORAZÓN

O venres, 11 de marzo, tivemos un contacontos no Bibliocastelo a cargo de María Carrera. Os afortunados e afortunadas foron os alumnos/as de primeiro.

 

Contounos dous contos relacionados co espazo da editorial Hércules : Astropal, un cometa con corazón, que foi o libro que traballaron os nenos e nenas de primeiro e Cosmo e a estrela perdida.

 

 

Ademais dos contos estreou en primicia unha nova canción, "A brincadeira", na que todos participamos.

 

 

 

Acompañou os contos con proxeccións sobre o espazo. Pasámolo xenial!! Cantamos, bailamos... Houbo contos, cancións e sobre todo moita diversión!

 

 

María, esperamos que volvas axiña ao noso Bibliocastelo! Contigo sempre o pasamos xenial!



  

 





 



 

8 DE MARZO, DÍA INTERNACIONAL DA MULLER

O pasado martes, 8 de marzo, foi un día moi especial, celebramos o Día Internacional da Muller. Algúns cursos celebrámolo no Bibliocastelo lendo e traballando con lecturas que tratan o tema da igualdade no traballo e tamén biografías de mulleres ilustres.
Outros cursos foron á entrega de premios do X Concurso de Viñeta e Ilustración, baixo o lema "A igualdade no traballo", que organiza cada ano o CIM do Concello de Bueu. Este ano o primeiro premio de educación primaria foi para Inés Brión Martínez de 6ºA do noso centro. Rocío Novas Santaclara e Salvador Santos Piñeiro de 5ºB recibiron cadansúa mención especial. Ademais a Ilustración de Salva foi escollida como deseño da X Campaña de Educación non Sexista do ano 2016, pola imaxinación creativa e o colorido da súa obra. Ollade os traballos presentados. 

 

 

 

 

Noraboa a todos e todas!

 



 VISITA ESPECIAL

 

Ademais, ese mesmo día, tivemos a sorte de recibir no Bibliocastelo a dúas mulleres moi especiais : Maricarme, a avoa de Noa e Cachito, a avoa de Ari. Contáronlles aos nenos e nenas de 4ºA como dende moi xovenciñas tiveron que compaxinar o traballo na casa co traballo fóra dela.

A avoa de Noa traballa na oficina de correos de Bueu e a avoa de Ari nun centro de saúde de Pontevedra.

Uns días máis tarde, visitounos a avoa de María, que actualmente traballa nun hotel de Cangas.

Se queres saber algo máis da visita destas mulleres traballadoras, preme na seguinte imaxe.   

 

 

 Moitas grazas, foi un pracer compartir un anaquiño de tempo con vós.

 

PRESENTACIÓN DO LIBRO "A nenez galega a través dos anteollos de Castelao"

O luns rematamos este febrero bisiesto cun broche especial. Tivemos a fortuna de asistir á presentación dun magnífico traballo titulado : "A nenez galega a través dos anteollos de Castelao". Trátase dun proxecto interdisciplinar que nos permite descubrir a través das viñetas de Castelao a crúa realidade dos nenos e nenas galegos de principios do século XX, situación que se prolongou durante moitos anos.

Os seus autores, Óscar Rodríguez e Diana Vilas, son ademáis docentes, concretamente el imparte clases de xeografía e historia no IES Illa de Ons; motivo polo cal o contido da obra é en realidade unha unidade didáctica para ser aplicada nas aulas de ensino secundario. Contaron ademais con colaboracións especiais como a de Manuel Rodríguez (pai de Óscar e mestre xubilado) así como a do Gabinete didáctico do Museo de Pontevedra.

Temos que destacar que esta non  é  a primeira publicación destes autores, contan xa con outras relacionadas co ensino da historia e da arte a través das TICs. De feito esta obra sería a segunda parte dun traballo editado o ano anterior baixo o epígrafe de "Cousas de nenos". Ambas as dúas producións contaron coa subvención da Deputación Provincial de Pontevedra.

Co gallo da presentación do libro, tiveron a deferencia de agasallar  o noso Bibliocastelo cun exemplar e malia estar pensado para alumnos/as de secundaria, parécenos tan interesante que non queremos deixar pasar a oportunidade de tratar de desenvolver, cando menos aquelas actividades que se poidan adecuar ao noso nivel.
A presentación tivo lugar no Centro Social do Mar de Bueu.

 

               Foi un pracer descubrir este tesouro. MOITAS GRAZAS.