VIDEOPOEMAS

Bos días amiguiños e amiguiñas:

Como estades? Eu vou levando bastante ben este confinamento grazas a vós, sobre todo a eses videopoemas tan fantásticos que me enviades. Paso todo o día ollándoos, así sinto que estou preto de vós.

Hoxe recibín outros dous chulísimos, de dous irmáns que están en 2ºB, son Lucas e Jan Hofkamp Recamán, que nos len dous fermosos poemas sentados nunha randeeira. Pero antes de ensinárvolos teño que pedirlle desculpas a Carlota, xa que onte publiquei tan só unha estrofa dunha fantástica poesía que inventou sobre a Lúa e o coronavirus. Déixovos o poema completo para que o escoitedes.

Xenial Carlota! Moitas grazas polos ánimos! Seguro que entre todos o venceremos!

                      
Jan recítanos un fermosísimo poema de Fermín Bouza-Brey titulado Nao senlleira. Encántame, Jan!

Lucas lenos un precioso poema de Federico García Lorca dedicado a cidade de Santiago de Compostela. Xenial, Lucas! Gústame moitísimo!

Moitísimas grazas rapaces e rapazas, estades facendo que esta situación sexa máis levadeira! Estou desexando vervos.

Biquiños e unha fortísima aperta.

VIDEOPOEMAS SOBRE A LÚA E O SOL

Ola amiguiños e amiguiñas:

Que tal a fin de semana?
O outro día os rapaces e rapazas de cuarto estiveron traballando poemas sobre o Sol e a Lúa do gran escritor galego Manuel María. Memorizaron e recitaron e incluso inventaron algunha estrofa. Encántanme. Ollade!

Raúl, o seu irmá Diego e o seu avó recítannos un fermoso poema. Son uns REQUETEVALENTES! (Eles saben porque llo digo). Coidade moito ao avó!!

Manuel Fernández Cruz, recítanos un poema de Manuel María. Ti tamén es un Requetevalente. Xenial, Manuel!

Carlota Medraño Fernández, recítanos unha fermosa poesía que ela inventou sobre a Lúa e o Coronavirus. Moi ben Carlota, ti tamén es unha REQUETEVALENTE!

Borja Verde Castro recítanos o poema do sol de Manuel María. Tamén inventou unha bonita estrofa:
                                 A Lúa chámase Canela
                                 e é unha señora moi presumida
                                 leva un chaleco con ela
                                 que lle durará toda a vida.  
Xenial, Borja!

Daniel Ríos Álvarez tamén inventou unha estrofa, na que a Lúa é a protagonista. Ollade!
                                 A Lúa chámase Macarena
                                 e é unha muller encantadora
                                 pero non é risueña
                                 pois non lle gusta vivir soa.

Moi ben, Dani!
Moitísimas grazas rapaces e rapaces, facédelo xenial! Seguide traballando así. Estou moi orgulloso de vós.
Biquiños e unha forte aperta.

  

27 DE MARZO, DÍA MUNDIAL DO TEATRO

Benqueridos amiguiños e amiguiñas:

Espero e desexo que esteades moi ben.

Hoxe celébrase o Día Mundial do Teatro. A mensaxe deste ano para conmemorar esta data tan importante está firmada por  Shahid  Mahmood  Nadeem, xornalista paquistaní, dramaturgo, guionista, director de teatro e televisión, e activista de dereitos humanos. Se queredes ler esta mensaxe premede na seguinte imaxe.

Como temos que estar na casa e non podemos ir ao teatro, ocorréuseme achegárvolo aos vosos fogares. Para que gocedes en familia co marabilloso mundo da escenificación déixovos unha actuación superdivertida do grupo Tricicle. Son boísimos! Para morrer coa risa! A función titúlase Na sala de espera do dentista. Xa me contaredes que vos pareceu. E agora dádelle ao vídeo e que suba o pano!!

Que vos pareceron? A min encántanme!!

Vouvos deixar un vídeo por se alguén lle apetece facer un teatriño de papel para escenificar ou facer algunha representación. Ollade!

Que pasedes unha boa fin de semana.

Moitos biquiños e unha forte aperta!

VIDEOPOEMAS

Bo día amiguiños e amiguiñas?

Que tal estades? Eu cada día estou máis ledo grazas aos videopoemas que me enviades. Chegáronme máis. Ollade!

Sandro Juncal Santos de 3ºA le a ritmo de pandeireta, o fermoso poema de Manuel María, Galicia, que aparece na súa obra Os soños na gaiola.
Xenial, Sandro. Encántame a túa interpretación!!

Ainhoa Santaclara Gil de 2ºB, acompañada polos seus peluches, recita un poema de Gloria Fuertes sobre a primavera. Moi ben Ainhoa. Chulísimo!

Moitísimas grazas, Sandro e Ainhoa por estes fantásticos videopoemas!

Moitos biquiños e unha gran aperta!

MÁIS VIDEOPOEMAS

Ola amiguiños e amiguiñas: 

Como o ides levando? Eu estou moi contento pois chegáronme novos vídeos con poemiñas chulísimos. Ollade!

Violeta Gago Rosales de 4ºA le o poema A serea poeta do libro Poemar o mar de Antonio García Teijeiro. Estupendo Violeta, encántame!

Vega Cruz Gómez de 1ºA le un poema do libro Poemas con piruleta. Moi ben, Vega! Eu tamén vos boto moito de menos! Estou desexando veros.

Inés Ferradás Verde de 4ºA recita o poema O soldadiño de chumbo de Ana María Fernández, do seu libro A casa de había unha vez. Xenial, Inés!  

Xela González de 4 anos recita un divertido poema sobre as vogais. Gústame moito, Xela!

                      

Noa Reboiras González de 3ºB le un poema de Gloria Fuertes, que nos conta como debuxar un neno. Falo xenial, Noa! Noraboa por esa gran interpretación!

Moitísimas grazas, rapazas!! Encántanme!!!

Biquiños e unha forte, fortísima aperta. Coidádevos moito!

VIDEOPOEMAS

Ola amiguiños e amiguiñas:
Estou supercontento, xa me chegaron os vosos primeiros vídeos recitando poemas. Como me gustan! Ollade!

 Estes rapaces tan feitiños son Raúl e Diego Gil Lemos. Fano moi ben, encántanme!

Este mozo tan simpático é Hugo de 6º de infantil. Xenial, Hugo!

 Pablo de 4º A  recítanos e cántanos un fermoso poema de Antonio García Teijeiro. Noraboa Pablo, gústame moito! 

Saray Martínez Martínez de 2ºB  lenos o poema Astronauta semanal que aparece publicado no libro "Poemas con piruleta". Xenial, Saray!

Moitísimas grazas por estes vídeos tan chulos! Moitos biquiños e apertas!

21 DE MARZO, DÍA MUNDIAL DA POESÍA

Benqueridos amiguiños e amiguiñas:

Como estades? Como o ides levando? Eu ando un pouco líado. Sabedes que hoxe é o Día Mundial da Poesía? Para conmemorar este día tan importante,   xurdiu unha iniciativa que se chama Poesía en tu sofá. É un festival que se vai celebrar ao longo destes días e proponlle a diferentes artistas que reciten poemas dende os seus perfís de instagram. Se queredes máis información pinchade na seguinte imaxe.

A min a idea pareceume fantástica. Que vos parece se nos unimos a ela pero a nosa maneira?

A actividade consistiría en gravar un pequeno vídeo mentres ledes un poema sentados no sofá. Logo enviádesmo ao meu correo bibliocasteloapedrapapirus@gmail.com e eu vou publicando no blog os vídeos que me vaiades enviando. Se vedes que os vídeos pesan moito podedes envialos por unha aplicación que se chama wetransfer. É moi doado, cargades o vídeo e poñedes a dirección do correo ao que queredes enviar e xa está. Pódese facer dende o móbil. 

Xa sabedes, aos que vos apeteza compartir algún poemiña, poñédesvos mans á obra!

Agardo impaciente os vosos vídeos!

Moitos biquiños e unha forte aperta!

    

UN DIVERTIDO CONTO

Ola amiguiños e amiguiñas:

Como o ides levando? Eu estou empezando a aburrirme un pouco. Boto de menos as vosas risas! Menos mal que estou cos meus amigos, os libros. Falando de libros... hoxe atopei un moi divertido que se titula "No me dejan hacer nada". Como me gustou tanto fíxenvos un vídeo. Ollade!

Que vos pareceu? Seguro que a vós tamén hai cousas que non vos deixan facer, non si? A min, unha morea delas. Non me deixan comer coa boca aberta e facer ruídos mentres como, non me deixan tirarlle dos tentáculos aos meus irmáns, non me deixan tomar o sol nas rochas, etc.

Se vos apetece podedes escribir ou debuxar nun folio algunhas cousas que os maiores, os vosos pais non vos deixan facer e logo confeccionamos no cole unha lista con todas as que apuntemos entre todos.
Espero que pasedes unha boa fin de semana! Ata o luns!
Biquiños e unha forte aperta.

CORONAVIRUS

Ola amiguiños e amiguiñas:
Como van as cousas por aí? Espero e desexo que esteades moi ben.
Hoxe vouvos falar un pouquiño do Coronavirus, o virus por mor do cal temos que estar na casa e non podemos saír a rúa nin ir ao cole. Supoño que a estas alturas xa oistes falar del, pero para que non vos queden dúbidas e saibades moi ben o que hai que facer para vencelo vouvos explicar unhas cousiñas. Creo que a mellor maneira de facelo é cun conto. Ollade!

                                     Cuento Rosa Contra El Virus

Leer más publicaciones en Calaméo

Espero que con este conto se aclarasen todas as vosas dúbidas. Xa sabedes que é moi importante lavarse ben as mans e por si a alguén non lle quedou claro, aí vai unha canción dos Lunnis onde o explican moi ben.

Que vos parece se debuxamos ao virus como se fose un monstro ao que vencemos cos nosos superpoderes? Entre todos e todas o conseguiremos!!

Agora vou poñer unhas recomendacións para as familias, para que vos axuden a entender e levar mellor esta situación tan anómala na que nos atopamos.

10 FORMAS DE AYUDAR A LOS NIÑOS A AFRONTAR EL BROTE DE COVID-19 Y EL AISLAMIENTO EN CASA

Leer más publicaciones en Calaméo

Espero e desexo de todo corazón que vos sirvan de axuda e sobre todo desexo que dentro dun anaquiño estemos todos fedellando e compartindo lecturas na miña casa, no Bibliocastelo. Bótovos tanto de menos!!! 

Mañá máis cousas. Quero que saibades que estou moi orgulloso de vós, sei que vos estades portando moi ben. Seguide así!

Moitos biquiños e unha forte aperta.

  

COMO REALIZAR UN MARCAPÁXINAS

Benqueridos amiguiños e amiguiñas:
Que tal vos vai? Como o levades? Espero e desexo que ben.
En primeiro lugar quero darvos as grazas polos comentarios que me puxestes, gustáronme moito. 
Como sei que vos gusta moito a lectura a actividade que vos propoño hoxe é realizar un divertido marcapáximas de monstro para marcar as nosas lecturas favoritas. Imos necesitar tan só un anaco de cartolina, unhas tesoira, un lapis, unha regra e pinturas para decorar. Os máis cativos e cativas podedes pedir axuda aos vosos pais, aos avós ou a vosos irmáns e irmás maiores. No seguinte vídeo aparece moi ben explicado. Ollade e poñédevos mans á obra!

Vouvos ensinar os que fixen eu. Ollade!

Cal vos gusta máis? Como vedes podedes decoralos como queirades, incluso podedes poñerlles orellas, lazos, sombreiros... as posibilidades son infinitas. A imaxinación non ten límites!
Estou desexando ver os vosos monstruiños!
Mañá máis. Deica logo!
Moitos biquiños e apertas!

P.D: Estas actividades que propoño son voluntarias, para quen queira realizalas. 

CARTA DE PAPIRUS

Benqueridos amiguiños e amiguiñas:

Xa sabedes que non hai cole e que temos que estar uns días na casa. Para que non vos aburrades e levemos esta anómala situación o mellor posible, ocorréuseme que podiamos facer cada día unha actividade, a modo de reto. Logo, cando volvamos ao cole podemos facer unha exposición con todos os  traballiños que vaiades facendo. Que vos parece?

Vou intentar crear unha conta de correo para que vos poidades comunicar comigo, para comentarme cousas, suxerencias...Cando a teña, publícoa no blog.

Imos coa primeira actividade :

1º- Pensade en cal é o voso libro favorito ou un que vos guste moito.

2º- Nun folio, na parte de arriba poñede con letra chulísima o título.

3º- Logo debuxade algo dese libro, a portada, unha escea que vos gustara moito, un personaxe...

4º- Pola parte de atrás escribide algo sobre el: porque vos gustou, copiade algunha frase chula, a descrición dun personaxe...

5º- Por último, gardade o traballiño. Cando regresemos ao cole quero que mos traiades. Pois vou encher toda a cortiza do corredor da biblio con todos eles, para que todo o mundo saiba os grandes artistas que son os rapaces e rapazas do cole a Pedra.

Agardo impaciente os vosos traballos!

Eu xa fixen a actividade de hoxe. Ollade!

 A imaxe de arriba é a parte de diante do folio e a de abaixo é a parte de atrás.

Que vos parece? Non debuxo moi ben, non é doado debuxar e pintar con oitos tentáculos, pero, o importante é facelo.

Bueno, poñédevos mans a obra. Para mañán vou preparar unha actividade de manualidades.

Bótovos moitísimo de menos! O Bibliocastelo non é o mesmo sen vós! Ata mañá!

Moitos biquiños,

8 de marzo, Día Internacional da Muller

Hoxe no Centro Social do Mar da nosa vila tivo lugar a entrega dos premios dos concursos que o CIM (Centro de Información ás Mulleres) organiza cada ano co gallo do Día Internacional da Muller.

 O acto estivo presidido por diverasas autoridades da vila entre as que se atopaban a Concelleira de Igualdade, a directora do CIM, o alcalde e varios concelleiros e concelleiras da corporación municipal. A encargada de abrir o acto foi a Concelleira de Igualdade Dna. Ana Isabel Otero Pastoriza, que deu lectura a un sentido discurso.

Seguidamente o alumnado do CEIP Montemogos fixo a presentación do acto.

Logo foi a entrega de premios. Do noso centro recibiron mención especial: Candela Castro e Aroa Rodríguez de 5º curso,  Xavi Santaclara, Lucas Chapela e Antía Leal de 6º curso.

Pechou o acto o señor alcalde D. Félix Juncal Novas.

Noraboa a todas e todos!

XXI SALÓN INTERNACIONAL DO LIBRO INFANTIL E XUVENIL DE PONTEVEDRA

Este vindeiro venres arranca o XXI Salón Internacional do Libro Infantil e Xuvenil de Pontevedra. Preme na imaxe superior para ver o programa do mesmo.

Haberá actividades moi interesantes, pero sobre todo hai unha que nos gusta especialmente, o musical dos Miserábeis, realizado pola comunidade educativa do IES Illa de Ons. Trátase do musical adaptado por primeira vez ao galego, dirixido polas mestras Teté García e Diana Vilas. Será o venres 13 de marzo no Teatro Principal de Pontevedra ás 21:00 horas. Non volo perdades! É incríbel!

No seguinte vídeo podedes ver un pequeno adianto.

  

Noraboa a toda a comunidade educativa do IES Illa de Ons por esta gran iniciativa e este espectacular traballo!